粵文書寫：練習「粵拼輸入法」打字的心得和體會，廣東話咬字練習

在上一篇相關文章內提到自己需要改善的懶音問題，例如 n 和 ng 的發音。在 2021 年初訂立的年度目標，除了透過聆聽和說話改善廣東話懶音，還有學習粵拼輸入法。至今使用倉頡輸入法已經十年以上，要轉換成新的輸入法實在難以習慣，可是為了完全解決懶音的問題，我決定一試。為了養成使用粵拼打字的習慣，及以加深對粵語拼音的了解，這篇文章將同樣以 21 日為基礎，記錄由 2021 年 5 月 1 日開始的粵拼打字練習筆記。受到《粵典》創辦人阿擇的啟發而中途轉用廣東話撰寫文章，請諒解。

安裝粵拼輸入法：

網上輸入法：Online Jyutping Input Method
iOS 及 Android 版：粵拼 Jyutping

粵拼輸入法：練習粵拼打字的心得和體會

學習粵拼打字的契機是 Clubhouse，雖然經過數個月前的糾正懶音練習，對正確發音有基本概念，但我對自己的發音並沒有十足信心（當然還有其他考慮因素而不使用 Clubhouse）。為 YouTube 影片錄音前寫稿，令我的發音比之前有進步，可是錄音前需要檢查每一個字的粵語拼音，這個步驟不知不覺造成心理負擔，要是不事先寫稿，可能 10 個字內依然有兩三個字是懶音，漸漸寫稿成為壓力來源。

歡迎先閱讀：

21 天糾正懶音挑戰：粵語正音學習筆記

練習粵拼打字的心路歷程

在 iPhone 和 iPad Pro 安裝粵拼輸入法（考慮到開發者的因素可以使用網上粵拼輸入法），分享首次使用粵拼打的段落是：「我呢一段字用粵拼打，諗咗好耐，仲要有六個字唔識打，講咗好耐終於試吓啦。」嘗試過後，我認為可以運用當初學習倉頡輸入法的方式，當時是把倉頡碼張貼在電腦旁方便打字時看着。所以我會用 Split-Screen Mode 開啟粵拼聲母和韻母元素表，並想辦法增加打字的機會，還有背誦常見廣東話字詞的拼音。因為目前對單字粵語拼音的概念不足，難以想出完整的粵拼碼，以下是我需要罰抄的廣東話拼音：


段	dyun
諗	nam
咗	zo
耐	noi
仲	zung
講	gong

利用個人記帳，增加粵拼打字的機會

暫時個人網站的文章仍然使用倉頡輸入法撰寫，因為目前為止粵拼打字速度太慢，未能把內心的想法好好記錄。而且使用 iPad Pro 的粵拼輸入有 bug，在 Smart Keyboard Folio 無法正常打字，需要開啟觸控式鍵盤。反而記帳是良好練習機會，較早之前在網站分享個人記帳的方法，我會把所有食材和日用品的細項逐一記錄，而這個紀錄過程更直接嘗試各種日常生活會使用的字詞。

練習粵拼打字的過程，發現自己對 z、c 和 s 的區分上有點模糊，要把文字直接讀出來仔細分辨拼音，這方面要從錯誤中學習。另外，以 j 代替 y 聲母暫時也未能習慣，因為以往是用 yat 表示日，現時使用粵拼需要用 jat。而且發現有些文字與印象中的讀音不同，例如囡字。一直以為父母用作稱呼女兒的廣東話，如果發音是「neoi neoi」應該寫作「囡囡」吧？不是，囡字的粵拼是 naam，原來囡囡的正確讀音是「男男」。

網上查詢粵拼碼：粵音資料集叢

除了使用粵語審音配詞字庫，最近發現另一個同類型網站粵音資料集叢，非常好用。粵音資料集叢每次最多可以查詢 10 個文字，而且搜尋結果資訊性高，除了查碼之外，可以分析廣東話的意思，例如「無」和「冇」字面意思相似，但讀音有明顯差別，前者是無奈、無可奈何，後者是冇心機、冇嘢。曾經很在意廣東話助語詞的正字例如㗎、嘅、啲，沒有仔細查證其背後意思的情況下，我卻一直在任何場合使用「無」字，即日起在廣東話字面上會重新使用「冇」字。

透過歌詞，閱讀大量粵拼注音示範

因為粵拼打字時無需輸入聲調，即使我對字調只有基本的概念，不熟悉廣東話九聲的聲調變化也不要緊。在翡翠粵語歌詞網站看着各種廣東歌歌詞，滿滿粵拼能夠掌握粵語拼音結構的能力，提升對拼音的理解程度。閱讀歌詞與練習打字的不同之處，有點像逆向思考吧。相比利用 YouTube 影片講稿作為練習稿，多接觸不同字詞的粵拼，利用粵拼歌詞練習更有效率，而且更有趣。

左圖：瀏覽《等待的藝術》歌詞時才發現「光」字的正確發音，除了 gw 圓唇音之外，還有 ng 韻母。右圖：《宮若梅》

香港本土用語：更深入了解廣東話

由呢段開始會用廣東話。喺練習粵拼嘅過程，搵咗好多有關廣東話發音同埋香港用語嘅資料，搵到《粵典》創辦人阿擇嘅 Medium，內容係推廣使用粵文書寫。所以啟發到我認真去諗，到底我應該用廣東話嚟寫文，定係用返書面語好呢？呢個問題應該短期內都未搵到答案，但至少喺我個人網站入面，所有同粵拼或者廣東話有關嘅文章，都會用返廣東話嚟打。

備註：受到《粵典》創辦人阿擇嘅啟發，決定開始用廣東話嚟寫呢一篇文，網站內其他內容主題嘅分享暫時會繼續沿用書面語。

暫時嚟講，有啲正確用字我仲未睇得慣，例如「噉」字，發音同「咁」根本唔一樣，點有可能取代到呢個字？我明㗎，所以呢方面我會畀心機。但個「冇」字就會好似前文所講咁會用返正確用字，除咗廣東話助語詞，仲有好多香港用語應該更加廣為人知，例如阿擇嘅呢一篇文章。

只要識讀，就識打嘅粵拼輸入法

暫時粵拼仲未成為我嘅主要輸入法，但當我遇到唔記得點寫嘅字，我就會用粵拼搵出同音字。而且了解粵拼嘅結構愈深，搵字速度同準確度愈高，例如我唔記得咗「頹廢」個頹字點寫，就開咗粵拼出嚟打「teoi」去搵。其實有懶音都好難用語音輸入，因為我每次用語音輸入都出錯字，不過由上一次《粵語正音練習：我的糾正懶音學習筆記》開始，透過錄音去聽清楚自己嘅發音（同一段文字讀到發音正確為止），之後再開返語音輸入係可以出返啱嘅字，因為發音時條脷點放係好影響所表達嘅意思。

喺呢 21 日嘅紀錄入面，學習粵拼輸入法呢件事仲係處於學習階段，同最初唔同嘅係我習慣咗試吓諗粵拼碼，而唔係用關聯字（打個如字會有埋果字嗰啲）。前文提到嘅粵拼歌詞、個人記帳等方法對我嚟講係 work，所以我會繼續去練習，我會再睇多啲粵拼歌詞去理解拼音結構，咁我自己用粵拼打字都會得心應手啲，希望有機會連寫文章都轉用粵拼。但係用粵拼記帳嘅「副作用」係衍生堆積帳單嘅問題，因為打得好慢，需要花好多時間同心力去完成。但係我當初決定學粵拼嘅目的係：只要識讀就識得打粵拼，咁我就可以確保自己每粒字都正確發音。